Planas cualifica como "inaceptable" que Noruega fixe cotas de pesca de maneira "unilateral"
Na reunión de ministros de pesca da UE prepáranse as negociacións co Reino Unido e con Noruega para a repartición de cotas nas augas compartidas
O ministro español de Agricultura e Pesca en funcións, Luis Planas, cualificou este luns de "inaceptable" que Noruega estea a fixar cotas de pesca de maneira unilateral. "Noruega está a manter unhas posturas unilaterais respecto da fixación de totais admisibles de capturas e cotas que nos parecen inaceptables", declarou o político á súa chegada á reunión de titulares de Agricultura e Pesca da Unión Europea que se celebra hoxe en Bruxelas.
Engadiu que se Noruega "efectivamente pretende aumentar as capturas" para vendelas á UE, "hai que facer xogar o principio de reciprocidade desde o punto de vista comercial e facer xogar os nosos intereses". Recoñeceu que o Estado nórdico é "un país amigo, incluído no Tratado do Espazo Económico Europeo". "Pero, sinceramente, eu creo que chegou o momento de incluír os aspectos comerciais pesqueiros na negociación con Noruega", dixo Planas.
Na reunión de ministros deste luns, abordaranse cuestións pesqueiras como a preparación das negociacións entre a Unión Europea e o Reino Unido e entre o club comunitario e Noruega para repartir as capturas nas augas compartidas.
Sobre o Reino Unido, Planas resaltou a "importancia" das poboacións compartidas de peces e confiou en que o acordo con Londres se peche antes do 10 de decembro. "Espero que sexa o caso para non ter que facer unha prolongación proporcional como se fixo nalgunha ocasión anterior", manifestou. Sinalou que España ten un interese particular na pescada norte, os rapes e galos e o lagostino. Como especies accesorias (aquelas que se capturan cando os obxectivos principais da pesca son outros peixes), destacou os ollomoles, o xurelo ou o bacallau.
