Kamala Harris e Zuckerberg, entre os 30 novos sancionados por Putin
Entre os sancionados están a vicepresidenta, Kamala Harris, e o fundador de Facebook, Mark Zuckerberg
Os incluídos na lista non poderán entrar en territorio ruso
Rusia respondeu este xoves a Estados Unidos cunha nova partida de sancións individuais contra case unha trintena de funcionarios, empresarios e xornalistas, entre eles a vicepresidenta estadounidense, Kamala Harris, e o fundador de Facebook, Mark Zuckerberg.
Os incluídos na lista non poderán entrar en territorio ruso por crear "unha axenda rusófoba", informou o Ministerio de Exteriores nun comunicado.
Tamén foron incluídos na lista altos cargos do Pentágono como a subsecretaria de Defensa, Kathleen Hicks, e o portavoz, John Kirby; ou o xefe de Gabinete da Casa Branca, Ron Klain.
Entre os cónxuxes de altos cargos tamén sancionados figuran Evan Ryan, muller do secretario de Estado, Antony Blinken; ou Douglas Emhoff, marido de Harris.
A lista inclúe a empresarios como o conselleiro delegado de Linkedin, Ryan Roslansky, e a expertos como Edward Acevedo, do Centro Wilson.
Entre os xornalistas sancionados destacan Bianna Golodryga de CNN; George Stephanopoulos da ABC; ou Kevin Rothrock do portal ruso Meduza.
O comunicado de Exteriores precisa que en breve anunciará unha nova batería de contramedidas polas "accións hostís das autoridades de EEUU".
O mércores EUA anunciou sancións contra unha rede de 40 individuos e empresas, liderada polo oligarca ruso Konstantín Maloféyev, que supostamente está a axudar a Rusia a esquivar as sancións de Occidente pola campaña militar rusa en Ucraína.
Tamén foron sancionados o banco comercial ruso Transcapitalbank, a compañía de criptomoedas rusas Bitriver e Tsargrad, un instrumento de propaganda rusa que presuntamente Maloféyev utiliza para actuar de intermediario entre o Kremlin e políticos prorrusos en Europa.
O Departamento de Estado de EUA restrinxirá tamén os visados a 635 cidadáns rusos.
O presidente de EUA, Joe Biden, anunciou este xoves a prohibición de que os barcos rusos atraquen nos portos do país, á vez que desvelou un novo paquete de asistencia militar a Ucraína por valor de 800 millóns de dólares.
