Segue a medrar o interese polas vivendas modulares máis sostibles e eficientes enerxeticamente
A sostibilidade e a eficiencia enerxética son valores que comparten estas chamadas casas industrializadas
A construción de casas modulares segue a medrar. Algunhas fontes do sector estiman que en España a demanda deste tipo de vivendas podería aumentar un 20 % neste 2024. Tendencia á que non é allea Galicia.
Isabel Cotelo, xerente da Inmobiliaria Será por Casas, afirma que "no sector o interese é xeneralizado".
Experta do sector inmobiliario, Isabel acaba de crear a súa propia axencia de vivendas industrializadas.
Neste tipo de casas a construción realízase en fábrica reducindo ao máximo os tempos de entrega. "Na fábrica está tres meses que tamén nos fan falta para tramitar licenzas, preparar o solo e cimentación para colocar a casa logo, pero unha vez que sae da fábrica e chegamos ao punto de construción en 15 días está montado", explica Isabel Cotelo.
A sostibilidade e a eficiencia enerxética son valores que comparten estas chamadas casas industrializadas.
No seu proceso de construción redúcese o seu impacto medioambiental e tamén hai aforro do consumo enerxético.
"Este tipo de construcións o que fai é que os illamentos e o modo de calefactalas sexan moito máis eficientes e polo tanto o aforro enerxético redúcese", engade Isabel Cotelo, da Inmobiliaria Será por Casas.
A revisión proposta da Directiva Europea de Eficiencia Enerxética dos edificios aspira a acadar un sector da construción climaticamente neutro a partir de 2050. O que fai previsible que o interese polas vivendas modulares siga medrando.
