Stellantis Vigo e as grandes automobilísticas paran outra vez pola falta de materiais

A crise de aprovisionamentos non lle dá tregua á industria da automoción.  A dirección da factoría do grupo Stellantis en Vigo, con case 6.000 traballadores, amplía as alteracións de produción previstas para a fin de semana e decidiu estendelas ata o martes.

No sistema 1 de produción, onde montan o Peugeot 301, o Peugeot 2008 e o Citroën C-Elysée mantense cancelada a actividade nas quendas da mañá do sábado 27 de agosto e a da noite do domingo 28, ás que se engaden agora as tres quendas do luns 29 e o martes 30.

Así llello comunicou aos traballadores a dirección da empresa, que os emprazou a reincorporarse o mércores 31, ás seis da mañá.

No sistema 2, mantense a suspensión da quenda da mañá do sábado 27 de agosto á que se engade a da quenda de noite do domingo 28, das tres quendas do luns 29 e das quendas A e B do martes 30.

A previsión é reiniciar a actividade o martes 30, ás dez da noite. Canto ao taller de baterías, no que xa se suspendera a actividade o venres, engádense agora paradas completas os luns e martes coa previsión de comezar outra vez o mércores, 31, ás seis da mañá.

Stellantis Vigo acumulou 40 paradas de produción durante o primeiro semestre do ano e durante as dúas semanas de actividade desde o regreso das vacacións a dirección xa se viu obrigada a comunicar alteracións na produción en tres ocasións.

Ademais da factoría de Vigo, Stellantis tamén interrompe o traballo en Zaragoza esta fin de semana, mentres que a fábrica de Volkswagen en Navarra pechará o 2 de setembro, cando se vai aplicar un ERTE.

A falta de compoñentes segue a atrasar a volta á normalidade nas grandes automobilísticas, que teñen que paralizar puntualmente a súa produción.

Na fábrica de Seat en Martorell, onde traballan uns 7.000 empregados, aínda é tempo de descanso polo verán. De xeito excepcional, esta semana estivo en marcha unhas das tres liñas de produción para recuperar o volume de fabricación de vehículos, que non se alcanzou durante o resto do ano. A partir do luns está previsto que os traballos retomen o ritmo habitual, pero a empresa avisa de que a subministración de compoñentes mantense volátil.

As tensións no aprovisionamento impulsaron a dirección de Ford en Almusafes a modificar tamén as datas de catro xornadas de ERTE previstas para finais de agosto e principios de setembro.

A Asociación de Fabricantes estima que a produción de vehículos en España caeu en 2021 un 25,6 % respecto a 2019. Para este ano non se atreve a facilitar datos, xa que vai depender da dispoñibilidade de chips.