Unha nena de sete anos entrou na lista dos youtubers máis ricos
Nastya gañou 24,6 millóns de euros en 2021
A súa canle ten máis de 85 millóns de subscritores
A revista Forbes publicou a lista dos dez youtubers mellor pagados do mundo. Son todos varóns, agás unha nena de sete anos, Nastya, que gañou case 25 millóns de euros o pasado ano.
Emigrou cos seus pais de Rusia aos Estados Unidos. Conta a familia que ao nacer lle diagnosticaran parálise cerebral, e que a superou. Puxéronlle como terapia traballar diante dunha cámara, e hoxe relata as súas actividades case cotiás na súa canle.
O último vídeo que colgou superou, en tan só doce horas, os dous millóns de visualizacións. Algún dos seus vídeos foi visto 900 millóns de veces. A canle de Nastya ten máis de 85 millóns de subscritores.
A maior parte dos ingresos dos youtubers procede da publicidade asociada aos seus vídeos e da venda de produtos propios.
