Volve a chuvia a Galicia logo do verán máis seco e caloroso desde 1961
Máis dun cento de concellos están en aviso amarelo: as Rías Baixas, a zona do Miño en Pontevedra e as zonas oeste, suroeste e noroeste da Coruña. Este luns esténdese a toda a conca do Miño en Pontevedra e tamén á metade sur da provincia de Ourense
O verán de 2026 foi o máis seco e caloroso en Galicia desde 1961, o que provocou un rápido descenso nas reservas hidricas e está afectando seriamente o campo
Sindicatos como Unións Agrarias falan de perdas de máis de 164 millóns de euros no campo
Chegan as primieiras chuvias a Galicia tras o verán máis seco desde 1961. Segundo MeteoGalicia, as previsións son de chuvia moderada, que se vai notar principalmente nas provincias da Coruña e Pontevedra. Aínda así, máis dun cento de concellos están en aviso amarelo: as Rías Baixas, a zona do Miño de Pontevedra e as zonas oeste, suroeste e noroeste da Coruña.
Esta tarde de domingo parou un pouco pero van volver as precipitacións. De feito mantense o aviso amarelo ata a media noite en todo o litoral atlántico, dende Camariñas ata Oia. Un aviso que mañá luns se estende a toda a conca do Miño en Pontevedra e tamén á metade sur da provincia de Ourense. Hai previsión de fortes bategadas e treboadas con carga eléctrica. Unha auga ben recibida logo de tanta seca e tanta calor. Combinaremos o paraugas coa manga curta, porque a temperatura manterase por riba dos vinte graos, e así vai ser durante durante toda a semana vindeira.
Estas chuvias veñen acompañadas dunha baixada drástica de temperaturas, especiamente notables despois dos valores rexistrados todo o verán
Segundo as previsións de MeteoGalicia, a chuvia vai continuar ao longo de semana e irá evolucionando en dirección leste ata alcanzar tamén as provincias de Lugo e Ourense.
📢Alta probabilidade de chuvia a vindeira semana☔️
— MeteoGalicia (@MeteoGalicia) August 22, 2026
⏹️A chegada dalgunhas frontes deixarán chuvias máis probables na metade oeste de #Galicia e tamén na metade leste pero con menores acumulacións.
🧐Cómpre seguir as predicións. #FelizFinde pic.twitter.com/saj2qynwxS
O verán 2026 rachou varias marcas históricas desde que hai rexistros
O verán de 2026 considérase oficialmente o máis cálido e seco rexistrado en España desde que comezaron as medicións en 1961.
Segundo os datos da Axencia Estatal de Meteoroloxía (AEMET) para o bimestre de xuño e xullo, este período superou múltiples marcas históricas:
Temperaturas de récord: A temperatura media situouse en 24,5 °C, o que supera en 0,7 °C as marcas anteriores de 2022 e 2025, e queda 2,9 °C por riba da media climática (1991-2020).
Precipitacións mínimas: É o arranque de verán máis seco da serie histórica, rexistrou só 17 litros por metro cadrado acumulados, por baixo dos mínimos anteriores de 1994 (21 l/m²) e de 2005/2016 (27 l/m²).
Impacto hídrico: A falta de choivas e a persistencia de sucesivas vagas de calor provocaron un rápido descenso nas reservas dos encoros ao longo do verán.
Repercusións da calor e da seca da primavera e o verán
A primavera e o verán de 2026 rexistraron a etapa máis seca da historia recente en Galicia, o que provocou un rápido descenso nas reservas de auga e afectou seriamente o campo. Sen embargo, foi un ano bo para o turismo. Especialmente porque ao bo tempo este ano engadiuse a eclipse solar. Pero Galicia non está habituada a unha seca tan prolongada e iso tivo repercusións negativas.
Estado dos encoros: Tras un inicio de ano húmido, a ausencia prolongada de precipitacións no verán deixou a conca de Galicia-Costa baixando velozmente de nivel. En encoros clave como Eiras e Baíña na área de Vigo obrigaron a activar prealertas e restricións de auga (como cortes en regas e baldeos) desde xullo.
Alertas municipais: En agosto, a escaseza hídrica levou a manter 32 concellos en alerta e máis de 200 en prealerta nas provincias de Pontevedra e A Coruña.
Medidas excepcionais: A situación reabriu o debate político e institucional sobre a necesidade de construír novos encoros e explorar captacións subterráneas para reter a auga de inverno antes de que desemboque no mar.
Impacto nas colleitas e a agricultura.
Cultivos de horta e forraxes: A tensión hídrica extrema e as altas temperaturas continuadas aceleraron a perda de humidade no chan, co que minguaron os rendementos da horta atlántica e o pasto dispoñible para a gandería reduciuse.
Sector vitivinícola: Nas denominacións de orixe, como Rías Baixas, Ribeiro e Ribeira Sacra, a seca e as vagas de calor obrigaron a adiantar a vendima. Aínda que a maduración do gran presenta boa calidade sanitaria, o tamaño do froito e o volume final de produción víronse significativamente recortados. Agora as chuvias chegan na segunda semana de colleita en lugares como a Ribeira Sacra. Os técnico consideran as chuvias beneficiosas, se non se prolongan no tempo e son mansas.
Sobrecustos operativos: Moitos gandeiros e agricultores tiveron que recorrer á suplementación alimentaria de emerxencia para o gando e ao uso extraordinario de camións cisterna para abastecer as explotacións. Sindicatos como Unións Agrarias fala de perdas de máis de 164 millóns de euros. O sindicato basea os cálculos, divulgados este venres pasado, na redución da produción de forraxes, pastos e auga para os cultivos e na alimentación do gando.
