A Fiscalía apela contra a sentenza do accidente de Angrois para evitar a condena do ex-xefe de Adif

A Fiscalía de Área de Santiago recorrerá contra a sentenza do accidente do tren Alvia ditada polo Xulgado do Penal número 2 de Compostela, segundo informou este luns a Fiscalía Superior de Galicia nun comunicado.

No recurso avánzase tamén que os detalles da apelación, que impugna parte da resolución xudicial, conforme ao criterio mantido pola Fiscalía de Área de Santiago, se darán en canto se presente no xulgado, o cal se producirá nuns días.

No gabinete de comunicación da Fiscalía Superior de Galicia precisan que non se poden trasladar aclaracións dos argumentos do recurso aos medios informativos "antes de que se notifique en instancias xudiciais".

A sentenza, de máis de 500 folios, transcendeu a finais de xullo, xusto despois de que se cumprisen 11 anos da traxedia. Nun primeiro momento, a xuíza deu un prazo de 10 días hábiles para recorrer, que terminaban o pasado 10 de setembro. Con todo, o volume das aclaracións solicitadas e a complexidade da causa obrigou a ampliar este prazo, que conclúe a próxima semana.

As vítimas din que engade "máis dor e frustración"

A Plataforma de Vítimas Alvia 04155 criticou a decisión de Fiscalía de recorrer contra a sentenza polo accidente, porque engade "máis dor e frustración" aos afectados, que, con todo, confían na solidez da sentenza.

Así o trasladou, en declaracións a Europa Press, o presidente da plataforma, Jesús Domínguez, que afeou o papel que está a xogar Fiscalía neste caso, tanto polos bandazos da súa posición como por, nas súas propias palabras, "defender os intereses dos poderosos".

"Adif xa está suficientemente defendido pola súa defensa", dixo Domínguez, en referencia tanto ao letrado de Andrés Cortabitarte como ao Avogado do Estado. "O que faltaba é que tamén o representase a Fiscalía", clamou o representante das vítimas, que tamén cargou contra os bandazos do Ministerio Público durante a instrución.

Tal e como lembrou, o primeiro fiscal do caso Antonio Roma, encargado agora tamén do recurso, rexeitou acusar o que fora director de seguridade de Adif, algo que logo si que ditaminou a Audiencia Provincial. Pola súa banda, o fiscal que actuou no xuízo, Mario Piñeiro, mantivo a acusación contra o responsable de Adif durante as sesións, pero retirouna "no último momento", apunta Domínguez, no trámite de conclusións definitivas.

Aínda así, a sentenza condenou tanto o maquinista como o exdirector de seguridade por 80 homicidios por imprudencia profesional grave.

"O que percibimos as vítimas son bandazos, porque a Fiscalía, en lugar de defender os intereses das vítimas, defende os intereses dos poderosos e cumpre co encargo do Goberno", destacou Jesús Domínguez,

O seu letrado trasladoulles que a presentación deste recurso contrario á sentenza é "inusual" e, para eles, "a sensación é de que non hai vergoña".

En todo caso, as vítimas confían en que a sentenza se manteña, dado que é "moi clara" en cuestións como que é incomprensible que non houbese máis medidas de seguridade no tramo ou a esixencia dunha análise de riscos que nunca apareceu.

A condena

O Xulgado do Penal Número 2 de Compostela condenou a dous anos e medio de cárcere a Francisco José Garzón Amo, maquinista do Alvia que descarrilou en Santiago o 24 de xullo de 2013, e ao que era director de Seguridade na Circulación do Adif no momento de posta en funcionamento da liña Santiago-Ourense, Andrés Cortabitarte.

Segundo o ditame coñecido a finais do pasado mes de xullo, a pena para cada un dos acusados é pola comisión de 79 delitos de homicidio e 143 de lesións por imprudencia grave.

Durante a fase de lectura das conclusións das partes, o fiscal Mario Piñeiro decidiu modificar o seu escrito e excluír o ex-xefe do Adif de responsabilidades, mentres que si que as mantivo respecto ao maquinista.

En concreto, considerou ao final do xuízo que, na súa condición de director de seguridade, non infrinxiu o deber que do cargo que ocupaba e actuou "de acordo cos procedementos incluídos no sistema de xestión" de Adif aprobado pola autoridade nacional e cunha metodoloxía baseada en normativa europea.