A UCO certifica que o fiscal xeral cambiou de móbil xusto despois de abrirlle causa o Supremo

A Unidade Central Operativa (UCO) da Garda Civil enviou un informe ao Tribunal Supremo no que certifica que o fiscal xeral do Estado, Álvaro García Ortiz, cambiou de teléfono móbil o pasado 23 de outubro, unha semana despois de que o alto tribunal abrira unha causa penal contra el.

Ese cambio de terminal produciuse, ademais, unha semana antes de que o xuíz Ángel Hurtado ordenase o rexistro do despacho do fiscal xeral para requisar os seus teléfonos e correos electrónicos, unha dilixencia que tivo lugar o 30 de outubro.

Nun informe, ao que tivo acceso EFE, os axentes analizan os dous números de teléfono e os IMSI/IMEI (identificadores) asociados das tarxetas do dispositivo telefónico intervido a García Ortiz. Nel explica que se atoparon dous números de teléfono, un do que recibe mensaxes da fiscal provincial de Madrid, Pilar Rodríguez, tamén imputada na causa, e outro a nome dun organismo dependente do Ministerio de Facenda.

E conclúen que "o inicio de actividade dos IMSI aparellados a estes IMEI é de data do 23 de outubro de 2024, é dicir, produciuse un cambio de terminal telefónico ese día respecto ás tarxetas precitadas".

A Garda Civil dixo que achara "0 mensaxes" no móbil do fiscal xeral entre o 8 e o 14 de marzo, período no que se filtrou presuntamente información da investigación por fraude de Alberto González Amador, parella da presidenta madrileña, Isabel Diaz Ayuso.

E a Fiscalía argumentou que unha instrución de 2019 en materia de protección de datos e unha guía básica de actuacións na Fiscalía aconsella aos membros da institución borrar periodicamente os dispositivos electrónicos por motivos de seguridade.

Fontes fiscais lembran que unha instrución aconsella a "destrución de forma segura de documentos e dispositivos en desuso" e a "limitación do prazo de conservación" de datos persoais "durante o tempo estritamente necesario".