Afluencia masiva no primeiro día da nova praza de abastos da Ponte, en Ourense
Despois de 13 anos pechada, acaba de reabrir a praza de abastos do barrio ourensán da Ponte
Ao longo da mañá, foron moitos os veciños que pasaron polo mercado para ver como quedou e facer as primeiras compras
Os vendedores, pola súa parte, confían en que o interese se manteña no tempo
A reapertura da praza de abastos número 2 de Ourense foi todo un acontecemento no barrio ourensán da Ponte.
"Unha marabilla, unha bendición, despois de tantos anos pechada". "Botabámola de menos. Onte viñemos á inauguración e agora vimos colaborar, mercar para que isto funcione". "Porque me gusta a praza, o trato de ti a ti", celebran dous veciños.
No seu momento, pechou para unha reforma, pero diso hai máis dunha década e os veciños xa perderan a esperanza de volver vela aberta.
"Pasaba por aquí e parecía un cemiterio, esa mole de pedra pechada. Pero agora hai que mantela". "Eu tiña moitas ganas de que abrira, porque a mercadoría é moito mellor e o trato tamén", sinalan outras veciñas.
Hai dez postos, do típico das prazas: carne, peixe, produtos gourmet... Tamén eles arrincan con moita ilusión.
"É a primeira vez que monto un negocio, que son autónoma, e teño moita ilusión por que vaia ben, que funcione e que teña boa acollida", di Nadina Manso, peixeira.
"Desde que abrimos hoxe á mañá non para de entrar xente. Estamos moi agradecidos", engade Rubén, o encargado da froitería.
A praza abre cun novo sistema de xestión que combina o mercado tradicional cun restaurante, onde se poden cociñar os produtos da praza.
Pablo Otero García, xerente da praza de abastos da Ponte: "Pensamos que o restaurante ten que tirar un pouco polos postos, porque se non a xente non vén ao mercado tradicional".
Confían en que o furor da inauguración se consolide no tempo para que os veciños da Ponte conserven o seu mercado de referencia.
