Barcelona entregaralle a Ibáñez a Medalla de Ouro a título póstumo

O alcalde de Barcelona, Jaume Collboni, anunciou este domingo que a capital catalá organizará un acto de homenaxe ao debuxante Francisco Ibáñez, falecido este sábado aos 87 anos, no que se lle fará entrega, a título póstumo, da Medalla de Ouro da cidade ao Mérito Cultural.

No acto de recoñecemento farase entrega á familia da medalla, concedida por unanimidade no plenario do mes de febreiro do ano pasado, despois de que no seu momento non se lle puidese entregar persoalmente ao debuxante.

Collboni asistiu esta tarde á capela ardente instalada no tanatorio de Sancho de Ávila para dar un derradeiro adeus ao ilustre debuxante barcelonés, visita na que depositou tamén unha coroa de flores en nome da cidade.

O alcalde dixo que Ibáñez "era unha persoa moi implicada na vida asociativa e cívica de Barcelona, que estivo a debuxar ata o último momento, expresándose con intelixencia e humor, facendo unha análise social e facendo pensar a tantas xeracións de cataláns e españois que mesmo aprenderon a ler cos seus cómics".

"A mellor maneira de renderlle homenaxe é pensando naquel home que sempre tiña unha palabra amable, un sentido do humor inquebrantable e un optimismo a proba de bombas. Moitos barceloneses e barcelonesas, de idades moi diferentes, sentimos esta tristeza por perdelo e tamén a alegría por aprender tanto del e dos seus escritos e dos seus personaxes, que xa forman parte das nosas vidas".

O rexedor asegurou que todas as propostas de recoñecemento que se fagan desde a cidade, desde as entidades ou desde o sector do cómic, recibirán o apoio do consistorio.

O plenario do consello municipal do 25 de febreiro do 2022 aprobou por unanimidade conceder as Medallas de Ouro de Barcelona ao Mérito Cultural aos debuxantes Francisco Ibáñez e Miguel Gallardo, falecido o ano pasado.

Barcelona decidiu honrar o historietista "pola súa incansable e intensa traxectoria creativa, como referente do mundo do humor e do cómic no noso país".