Boas perspectivas na campaña da vieira que empezou este luns en Barallobre
Prevén extraer máis de corenta toneladas de bivalvo, a maioría de tamaño grande, nas 24 xornadas de traballo programadas
Cara á lonxa de Barallobre, Fene, entraba pasada as dez e media da mañá a primeira descarga de vieira dunha campaña que o mariscador Luis considera boa:
"Hai vieira bastante e case toda grande... de quitado unha pouquiña pequena... vaia ´pequena´ xa ve como é, por se non dá os quilos. Pero ben. Rastréase ben, está ben a cousa", di.
A perspectiva desta confraría é extraer 1.700 quilos cada día de traballo de aquí ao 27 de febreiro coidando de deixar na ría as de menos de doce centímetros como medida de protección do recurso. 9 de cada dez son de talle grande.
"A vieira está chea a rebordar. É unha vieira boa e grande. Imos a dous tamaños como na campaña pasada e que fixemos ben; de 12 a 13 tamaño mediano e de 13 cm para enriba, grande. O prezo vai ir a 4,20 a mediana e a 4,75 a grande, falando de prezo ao armador" di Jorge López Pena, patrón da Confraría de Barallobre.
Ás cifras sinaladas hai que engadirlle as taxas das lonxas, o IVE, e os custos da depuración e da evisceración que se efectúa nas instalacións de Artesa Rías Baixas.
Lembra o patrón da Confraría que o ano pasado a toxina variou os plans de extracción, mentres que esta campaña, a priori, se presenta "bastante boa", di Jorge López.
As vieiras da estrea de campaña de Barallobre entran agora no proceso de depuración e logo evisceración. Este mércores chegarán ao mercado para a venda en fresco do produto extraído por un total de 34 profesionais.
"Se pagan e seguen mercando, hai vieira bastante", di Luis, un dos mariscadores partícipe da primeira descarga da campaña de 2025.
