Churros e zapatillas, tradicións de Aninovo en Betanzos
A tradición brigantina leva a mocidade ata o mercado para rematar a festa
As zapatillas compradas úsanse ata o vindeiro ano
En Betanzos e a súa bisbarra a tradición dos churros lévaos de compras ao mercado de Aninovo.
Din que se non van, non é fin de ano.
Alá cumpren outra tradición local inescusable: cambiar o calzado de festa por unhas zapatillas, cómodas e quentes. Tras horas de xolda os pés doen moito, aínda que hai quen leva o calzado máis cómodo para evitalo. Entre os locais sempre hai forasteiros que descobren a tradición con pracer.
Por cinco euros o par, cómpre probalas, non vale calquera zapatilla: teñen que durar doce meses. Hai quen as merca aquí todos os anos.
Durante 365 días, unha soa ollada aos pés vainos transportar a ese momento no frío Aninovo no mercado brigantino, con ganas xa do próximo.
