Corea do Sur declara o loito e investiga a avalancha que xa deixou 154 mortos
A cifra pode aumentar porque hai uns 133 feridos
As autoridades de Corea do Sur confirmaron 154 mortos e 133 feridos na avalancha e avanzan que as cifras poden aumentar.
Moita xente aínda non deu cos seus seres queridos. Están denunciadas máis de 350 desaparicións.
Unha muller di que o seu familiar non figura na lista de vítimas identificadas ata o momento.
Un australiano que vive en Seúl perdeu os tres amigos que o acompañaban. Un morreu e os outros dous están hospitalizados. Explica que á rúa onde se orixinou a traxedia non deixaba de entrar xente.
É unha rúa estreita, de menos de catro metros de ancho e en pendente. As testemuñas din que houbo unha caída masiva desde arriba. Moitas vítimas morreron por asfixia.
O xefe dos bombeiros indicaba no lugar que eran sobre todo adolescentes e mociños duns vinte anos e que tamén había estranxeiros.
De feito, ata agora sábese de 19 estanxeiros mortos de 14 países distintos.
O presidente do país visitou o lugar e prometeu que investigarán as causas a fondo para que non volva ocorrer.
A continuación, o mandatario decretou loito oficial no país.
Moitas testemuñas din que faltou policía e un maior control, tendo en conta que a festa de Halloween reuniu arredor de 100.000 persoas neste barrio de ocio da cidade.
Un veciño mantén, porén, que logo de tres anos de restricións pola covid a mocidade tiña ansia de celebrar e que era difícil limitar a participación.
O país non deixa de recibir condolencias oficiais desde distintos puntos do mundo.
Corpos das vítimas na rúa en Seúl
