Detido o suposto autor dun roubo nunha vivenda de Cospeito

A Garda Civil detivo un veciño de Vilalba como presunto autor dun roubo violento e do delito de ameazas por subtraer diñeiro nunha vivenda de Cospeito e ameazar cun coitelo de grandes dimensións os seus moradores.

Segundo informou a Comandancia de Lugo, os feitos ocorreron na madrugada do pasado sábado, cando o sospeitoso se presentou nesta vivenda, onde reside un coñecido seu, para pedirlle diñeiro.

Unha vez no interior, comezou a comportarse de forma violenta, xa que o propietario non accedeu á súa petición.

Elevou o ton e empezou a ameazar o morador da casa, colleu un coitelo de grandes dimensións e púxollo no pescozo.

A vítima logrou zafarse nun descoido e empuxou o asaltante ao exterior do seu domicilio.

Con todo, o sospeitoso empezou a golpear a porta do inmoble cunha barra de ferro ata que conseguiu abrila e entrou de novo na vivenda. A vítima fuxiu pola parte traseira e escondeuse nas inmediacións.

Como non conseguiu dar con el, o asaltante volveu ao interior da vivenda, onde se atopaba unha familiar de avanzada idade da vítima, á que intimidou ata que logrou que lle dixese onde gardaba 500 euros da súa pensión. Tras apoderarse do diñeiro, o ladrón fuxiu nun vehículo.

A Garda Civil estableceu un dispositivo de procura para dar co sospeitoso, que puido deter horas despois.

Tras poñelo ao dispor do xulgado de instrución 2 de Vilalba, a autoridade decretou o seu ingreso en prisión provisional no centro penal de Bonxe.