Detido un veciño da Coruña por unha vaga de roubos en varios concellos
A Garda Civil detivo un veciño da Coruña como presunto autor dunha vaga de roubos na Coruña, Ordes, Arzúa e Betanzos.
No marco da operación Orsiro, levada a cabo polos membros do Posto de Ordes, Sigüeiro e o Equipo ROCA de Santiago de Compostela, logrouse a detención dun individuo pola súa presunta participación nunha serie de delitos que xeraron alarma social nas comarcas da Coruña, Ordes, Arzúa e Betanzos.
A operación levouse a cabo despois dunha vaga de roubos no interior de vehículos nas áreas mencionadas. Principalmente, os vehículos afectados eran turismos estacionados en lugares
pouco transitados e aparcadoiros exteriores próximos a igrexas.
O modus operandi do sospeitoso implicaba inicialmente a subtracción dun vehículo na área metropolitana da Coruña, utilizando chaves previamente roubadas. Logo desprazábase a outras localidades, onde levaba a cabo labores de vixilancia en zonas pouco transitadas.
No caso de vehículos recentemente estacionados coas portas abertas, procedía á subtracción de obxectos de valor, como lentes de sol, carteiras, bolsos, teléfonos móbiles e pezas de vestir. Se o vehículo estaba pechado, rompía algún cristal para consumar o furto.
