Os Estados Unidos recoñecen a Edmundo González como presidente electo de Venezuela

Os Estados Unidos recoñeceron este martes por primeira vez en público o opositor Edmundo González Urrutia como presidente electo de Venezuela tras as eleccións do pasado 28 de xullo.

"O pobo venezolano pronunciouse contundentemente o 28 de xullo e nomeou a Edmundo González como presidente electo. A democracia esixe respecto á vontade dos votantes", dixo o secretario de Estado, Antony Blinken, en redes sociais.

The Venezuelan people spoke resoundingly on July 28 and made @EdmundoGU the president-elect. Democracy demands respect for the will of the voters.

— Secretary Antony Blinken (@SecBlinken) November 19, 2024

A Administración de Joe Biden recoñeceu o pasado 1 de agosto a González Urrutia como o gañador dos comicios, pero evitara ata o de agora declaralo "presidente electo" de Venezuela.

O Consello Nacional Electoral (CNE) proclamou neses comicios a reelección de Nicolás Maduro como presidente de Venezuela, pero o organismo non publicou as actas cos resultados desagregados das eleccións.

A Plataforma Unitaria Democrática (PUD), a principal coalición opositora do país, presentou pola súa banda unhas actas que dan a vitoria ao seu candidato, González Urrutia, quen desde setembro está exiliado en España denunciando unha persecución das autoridades venezolanas.

Esta é a primeira vez que Estados Unidos utiliza o termo "presidente electo" para referirse a Edmundo González Urrutia, confirmou a EFE un alto funcionario da Administración.

A razón pola que o Goberno de Biden decidiu empregar este termo está relacionada coa inminencia da toma de posesión de Maduro para un terceiro mandato, que está prevista para o 10 de xaneiro.

Segundo esa fonte, esta designación non implica que Estados Unidos recoñeza a González Urrutia como presidente venezolano, pero si recalca a súa postura de consideralo como o gañador das eleccións.

Un portavoz do Departamento de Estado dixo a EFE que está "claro" tanto por Estados Unidos como por outros países e observadores electorais que González Urrutia "tivo o maior número de votos" e iso "convérteo en presidente electo".

"O pobo venezolano expresou de maneira abafadora e inequívoca o seu desexo dun cambio democrático; as actas de votación dispoñibles publicamente así o din", declarou.