Europa alerta do "enorme risco" de atentado en territorio comunitario polo conflito na Franxa de Gaza

A comisaria europea de Interior, Ylva Johansson, alertou este martes sobre o "enorme risco" de atentados na Unión Europea durante o Nadal debido á polarización na sociedade europea pola guerra entre Israel e Hamas.

"Coa guerra entre Israel e Hamas e a polarización que causa na nosa sociedade, coa próxima temporada do Nadal existe un enorme risco de ataques terroristas na Unión Europea como vimos recentemente en París", sinalou Johansson en declaracións á prensa á súa chegada ao Consello europeo de Interior.

Ese risco de atentados, como o que custou a vida a un turista alemán e feriu a dúas persoas máis no centro de París, foi un dos temas na axenda da reunión de ministros de Interior que se celebrou en Bruxelas, e que foi a última neste formato durante a presidencia española do Consello da UE, que conclúe o 31 de decembro.

Preguntada posteriormente en rolda de prensa, xunto ao ministro español de Interior, Fernando Grande-Marlaska, Johansson lembrou que o nivel de ameaza terrorista é "unha competencia nacional" e que "moitos estados membros teñen agora un nivel máis alto"." Iso lévame a concluír que si, a ameaza é maior agora que antes", subliñou.

"Tamén vemos que a retórica antisemita e antimusulmá está a crecer dramaticamente, do mesmo xeito que a desinformación e, en conxunto, están a facelo. Fago a avaliación de que si, a ameaza é significativa", recalcou.

Pola súa banda, o ministro de Interior español manifestou que normalmente en datas como o Nadal, onde hai concentracións, festas relixiosas e festas laicas de todo tipo,  se determina tamén se procede ou non" aumentar o nivel". 

Con todo, Grande Marlaska quixo lanzar unha mensaxe de tranquilidade ao trasladar "que, sendo conscientes do risco terrorista, levamos moitos anos traballando, traballando dunha forma intensa coas nosas forzas e corpos de seguridade do Estado conxuntamente coordinadas".

"O risco cero non existe. Pero o que si podemos trasladar e transmitir á sociedade que a cooperación e coordinación no marco da Unión Europea na prevención e na loita contra o terrorismo é moi importante, así como con terceiros países socios, para facer fronte "ao terrorismo internacional neste caso, neste suposto, ao terrorismo xihadista", manifestou o ministro do Interior español.