Éxodo masivo cara ao sur en Gaza, que queda sen auga por falla de enerxía

A maior riqueza que alguén pode ter en Gaza é unha botella de auga, un recurso extremadamente escaso para os dous millóns de habitantes da Franxa, sumidos nunha crise humanitaria sen precedentes no enclave.

A falta de auga non se debe tanto ao peche das tubaxes ordenado por Israel o luns, revogado agora parcialmente, como á escaseza de combustible para as desalinizadoras que abastecen a poboación repartindo auga en camións.

A auga da billa na Franxa, extraída do subsolo, é practicamente imposible de beber pola súa alta salinidade. O Ministerio de Infraestruturas israelí confirmou a decisión de "renovar a subministración de auga nun punto concreto para os residentes do sur da Franxa de Gaza".

Con todo, é apenas unha pinga no deserto, xa que a auga proporcionada por Israel en tempos normais supón apenas o 7 % do consumo total no enclave, e Nacións Unidas xa advertiu de que levar combustible a Gaza é a única maneira de salvar a poboación da morte por deshidratación.

Éxodo cara ao sur

Unhas 600.000 persoas, a metade da poboación do norte, fixeron caso á orde de evacuación israelí e trasladáronse ao sur, creando unha situación de crise humanitaria de enormes dimensións nas cidades meridionais de Jan Yunis e Rafah, que non están preparadas para tal emerxencia.

Mentres, o exército israelí segue bombardeando a Franxa. A Administración local comeza a abrir foxas comúns para soterrar os corpos sen identificar porque a falla de electricidade impide conservar os cadáveres nos hospitais.

O último reconto de vítimas mortais en Gaza elévase 2.670 falecidos e máis de 9.600 feridos.

Invasión terrestre

Do lado de Israel, mentres se seguen sumando tropas á fronteira para ultimar a invasión terrestre, as autoridades evacúan os últimos habitantes que quedaban en Sderot. 

O primeiro ministro israelí Benjamín Netanyahu convocou por primeira vez o gabinete de guerra e o Ministro de Defensa israelí insistiu no que chegará nos próximos días.

"Esta será unha guerra intensa, será una guerra letal, será una guerra precisa e será una guerra que cambiará a situación para sempre".

Ante o aumento de ataques na fronteira co Líbano, onde este domingo caeu un mísil no cuartel xeral da misión da paz da ONU, sen causar baixas, Gallant advertiu:

"Se Hizbollah elixe o camiño da guerra, pagará un prezo moi alto, moi alto. Pero se se contén, respectaremos a situación".

Polo momento 16 persoas morreron nos enfrontamentos desta fronteira, entre eles tres civís libaneses.

Os EUA, a UE e Irán

O presidente dos Estados Unidos, Joe Biden, falou coa Autoridade Palestina, condenou o ataque de Hamás e asegurou que traballa cos aliados para garantir axuda humanitaria e evitar que o conflito se estenda. Confirmou, ademais, o envío dun segundo portaavións ao Mediterráneo.  

A Unión Europea emitiu un comunicado no que lle pide a Israel que se defenda de Hamás respectando o dereito internacional e garantido a protección dos civís. 

Irán informou de que van participar na reunión da Organización de Cooperación Islámica, o maior bloque político do mundo islámico para analizar o conflito e insistiu en que non será un mero "espectador" ante os crimes cometidos en Gaza, ademais de alertar do risco de que este conflito se estenda pola rexión.