María Araujo, única galega dunha selección española moi renovada

Ángela Mataix, Claudia Soriano, Elena Buenavida e Txell Alarcón son as novidades da lista do seleccionador de baloncesto feminino Miguel Méndez para a última xanela de clasificación para o Eurobasket 2025, na que Alba Torrens, Mariona Ortiz e Paula Ginzo non foron incluídas por descanso.

"É unha lista na que faltan xogadoras que estiveron nas últimas convocatorias e que estarán na de verán, como Mariona Ortiz, Paula Ginzo ou Alba Torrens. Estas baixas son por decisión técnica e coa intención de darlles descanso nunha tempada moi cargada pola dobre competición. A elas únense as baixas de Raquel Carrera e María Conde por lesión, e nesta ocasión Laura Quevedo, que non poderá estar por motivos persoais", expresou Méndez.

"Aproveitamos estes dous partidos fóra de casa para ver competir a este grupo de 20-24 xogadoras que están en seguimento continuo. Parécenos que é o momento adecuado para velas competir e seguir formando ao equipo que nos vai representar non só no Europeo 25 e, esperemos, no Mundial 26, senón sobre todo, no Europeo 27 e os Xogos Olímpicos do 28", engadiu o técnico.

Nesta xanela, na que a selección chega invicta e só necesita unha vitoria para certificar a súa clasificación, xogará o xoves 6 de febreiro, ás 19 horas, contra Austria en Viena; e o domingo 9, ás 14:30 horas, contra Países Baixos en Almere.

🚨 OFICIAL | Estas son las 1️⃣4️⃣ jugadoras CONVOCADAS por @miguelmmendez para la sellar la clasificación para el @EuroBasketWomen 2025.

📅 Del 2 al 10 de febrero#LaFamilia #SomosEquipo pic.twitter.com/NguZklHeU4

— Baloncesto España (@BaloncestoESP) January 27, 2025

Nesta fase de clasificación participan 36 seleccións nacionais, incluídas os catro países anfitrións do campionato, xa clasificados de oficio. Suecia e Turquía xa conseguiron o seu billete como primeiros de grupo quedando 10 prazas por asignar que serán para os primeiros de cada un dos oito grupos, máis os catro mellores segundos clasificados.