Morre Jean-Marie Le Pen, impulsor da extrema dereita francesa

Jean-Marie Le Pen, pai de Marine Le Pen e fundador da Fronte Nacional (agora Agrupación Nacional), morreu este martes aos 96 anos.

Foi o líder da extrema dereita francesa durante máis de catro décadas, entre 1971 ata 2011 e xa fora hospitalizado varias veces nos últimos anos.

Nunha mensaxe na súa conta de X, Jordan Bardella, o presidente da Agrupación Nacional anunciou a súa morte e rendeulle homenaxe ao destacar que Jean-Marie Lle Pen "serviu sempre a Francia, defendeu a súa identidade e a súa soberanía".

Jean-Marie Le Pen est mort.

Engagé sous l’uniforme de l’armée française en Indochine et en Algérie, tribun du peuple à l’Assemblée nationale et au Parlement européen, il a toujours servi la France, défendu son identité et sa souveraineté.

Je pense aujourd’hui avec tristesse à…

— Jordan Bardella (@J_Bardella) January 7, 2025

A noticia colleu por sorpresa a súa filla, Marine Le Pen, que se atopaba de volta a París dende o arquipélago francés de Mayotte, no Índico, que foi informada polos xornalistas, segundo indicou un enviado especial de France Info que viaxaba con ela no avión. 

A figura histórica da extrema dereita francesa faleceu nun centro sanitario de Garches (oeste de París), onde levaba internado varias semanas pola delicadeza do seu estado de saúde, feito polo que foi hospitalizado dende comezos de novembro a partir dunhas análises preocupantes.

 A Agrupación Nacional foi, con moita diferenza, o partido máis votado nas eleccións europeas e lexislativas que se celebraron en Francia en 2024, con máis de once millóns de sufraxios.

"En seis décadas de loita política activa, demostrou ser un visionario que impuxo no debate público os grandes temas que actualmente estruturan a política como a demografía, a inmigración, a globalización e a perda de competitividade de Francia, a soberanía nacional e o risco de disolverse na Unión Europea", destacou o seu partido.

A Agrupación Nacional mostrouse convencida de que quedará na memoria "como un loitador intrépido e indomable ao servizo dunha visión de Francia orgullosa e conquistadora; para os patriotas das nacións de todos os continentes das que defendeu sen descanso a súa dignidade, manterase como un defensor emblemático dos pobos".

Jean-Marie Lle Pen, que con 28 anos fora o deputado máis novo cando foi elixido por primeira vez en 1956, presentouse cinco veces como candidato á presidencia francesa, aínda que só nunha ocasión chegou á segunda volta, en 2002, cando foi rotundamente derrotado polo conservador Jacques Chirac grazas á estratexia do chamado "cordón sanitario".