O G7 comprométese a illar máis a economía de Moscova pola invasión de Ucraína
As grandes potencias pactan reducir a dependencia enerxética de Rusia
Os países da UE non chegan a un acordo para prohibir a compra de cru ruso
Os Estados Unidos anunciaron unha nova batería de sancións contra Rusia no marco dunha reunión dos líderes do G7 en que as grandes potencias industriais se comprometeron a illar aínda máis a economía de Moscova por causa da invasión de Ucraína.
Os países europeos do G7 non puideron anunciar as súas propias sancións porque os vinte e sete foron incapaces de alcanzar un acordo para prohibir as importacións de petróleo de Rusia debido á dependencia dalgúns socios do cru de Moscova.
Nun comunicado conxunto distribuído pola Casa Branca, os líderes do G7 reiteraron o seu compromiso para reducir a dependencia da enerxía rusa, "que inclúe eliminar ou prohibir a importación de petróleo" dese país.
Na reunión, que se celebrou de xeito virtual, tamén estivo presente o presidente ucraíno, Volodimir Zelenski. Tras reafirmar a súa intención de vencer as tropas rusas, lembrou a súa dependencia dos socios internacionais para acadar recursos militares.
En resposta, os líderes do G7 reiteraron o seu compromiso coa soberanía e a integridade territorial de Ucraína e prometeron tomar máis medidas contra Moscova.
Sancións
Despois da reunión, os Estados Unidos anunciaron sancións contra 27 directivos do banco ruso Gazprombank, que é a principal vía usada polos Estados membros da Unión Europea para comprar gas procedente de Rusia.
Washington tamén tomou medidas contra as cadeas de televisión rusas Channel One, Rossiya e NTV, contra o fabricante de armas Promtekhnologiya e contra sete compañías navieiras.
.png)
