Os empregados públicos mutualistas saen á rúa en defensa de Muface

Representantes dos traballadores públicos mutualistas saíron este mércores á rúa en defensa de Muface, despois de que a primeira licitación do concerto sanitario quedara deserta porque as aseguradoras non se presentaron á renovación do convenio ao non considerar suficiente a subida da prima proposta polo Goberno.

Os sindicatos CCOO, UXT, ANPE, Adide, USIE, UFP, SUP, Acaip e SIAT convocaron unha manifestación ás 10:30 horas en Madrid fronte á sede da patronal das aseguradoras Unespa.

En Vigo os sindicatos concentráronse esta mañá para reclamar "unha solución xa", "un acordo estable, razoable e satisfactorio" que garanta a asistencia dos empregados públicos. Afirman que tomarán "as medidas oportunas" para conseguilo.

Pola tarde, as concentracións serán diante da sede de Muface en Madrid e nas súas respectivas delegacións provinciais. O sindicato CSIF, mentres, convocou para o vindeiro sábado unha "gran mobilización" diante da Dirección Xeral de Muface en Madrid.

Con estas mobilizacións esíxenlle ao Goberno unha nova licitación para Muface e ás aseguradoras e que se subscriba canto antes un novo convenio que garanta a continuidade do concerto sanitario.

O Goberno abriu unha consulta coas aseguradoras

As tres aseguradoras que ata o de agora prestaban atención en Muface (Adeslas, Asisa e DKV) non se presentaron á nova licitación para os anos 2025 e 2026 convocada pola dirección de Muface porque o Goberno expuxo unha subida nas primas do 17,12 %, por baixo da petición das aseguradoras, que estaba arredor do 40 %.

Ao quedar deserta a licitación, o Goberno abriu un prazo de dez días hábiles, desde o 21 de novembro ata o 4 de decembro, para que as aseguradoras notificasen a Muface a que prezo prestarían o servizo sanitario.

Muface recompilará as contestacións presentadas e, se o considera oportuno, poderá solicitar aclaracións ás entidades participantes antes de elaborar un informe final que será publicado na Plataforma de Contratación do Estado.

López garante que haberá nova licitación antes de que remate o ano

O ministro para a Transformación Dixital e da Función Pública, Óscar López, garantiu este martes que haberá unha nova licitación de Muface antes de que acabe o ano, despois de que o Goberno lanzase unha consulta ao sector asegurador para saber a que prezos aceptarían acudir a un novo concerto sanitario para o período 2025-2027.

O ministro lanzou "unha mensaxe de tranquilidade" aos mutualistas de Muface, a quen garantiu que van ter "cuberta" a súa asistencia sanitaria pola Lei de Contratos do Sector Público.

López lembrou que a Lei de Contratos do Sector Público contempla ferramentas para prorrogar o concerto actual durante un tempo, ata que se resolva o convenio, de forma que todos os mutualistas queden cubertos.