Pechada parte da ría de Pontevedra dez días antes da Festa da Ameixa

E de novo problemas coa toxina, desta volta na ría de Pontevedra. De momento, está prohibido extraer ameixa da zona do fondo da ría de Pontevedra, a máis pegada ás praias, en Poio.

Por segunda vez no que levamos de ano, o Instituto Tecnolóxico para o Control do Medio Mariño, o Intecmar, pecha o marisqueo ante a presenza de toxina paralizante na auga.

O peche chega nun momento de moita actividade marisqueira para as confrarías da zona porque en dez días está previsto que se celebre, en Poio, a edición número trinta e cinco da Festa da Ameixa.

Pero xa o ano pasado a cita gastronómica se celebrara case tamén contra o reloxo por un peche, igual que pasa agora, de parte da zona da ría. Finalmente consumíranse cincocentos quilos de ameixa.