Queiman unha decena de contedores en varios puntos de Carballo
Os incendios producíronse en tres lugares distintos da vila en pouca marxe de tempo
(Imaxe: Consorcio contra Incendios e Salvamento da Coruña)
Os bombeiros do parque comarcal de Carballo tiveron que intervir a pasada madrugada en varios puntos deste municipio, debido a incendios que afectaron a unha decena de contedores.
Segundo informou o servizo de extinción, sobre as 5:18 horas recibiuse un aviso para acudir á intersección entre as rúas Camelias e Begoñas, onde arderon dous contedores de lixo. Só vinte minutos despois tiveron que acudir á rúa Verdillo, onde o lume calcinou outros catro contedores; e nunha terceira intervención tiveron que actuar na rúa de Fondal Ponche, preto do cemiterio de Bértoa, onde arderon outros 4 contedores.
Por outra banda, efectivos do parque comarcal de Boiro acudiron a pasada medianoite a un domicilio de Iria Flavia, en Padrón, ante o aviso dun incendio.
Ao chegar, os bombeiros comprobaron que non había persoas atrapadas e que as lapas xa foran extinguidas, polo que procederon á ventilación da vivenda. A orixe do lume estivo nunha cazola que quedou ao lume na planta baixa do inmoble.
