Trump podería concederlle a TikTok una prórroga de 90 días para evitar o veto

O presidente electo estadounidense, Donald Trump, afirmou este sábado que "probablemente" concederá a TikTok unha prórroga de 90 días para evitar a súa prohibición nos Estados Unidos.

"Creo que esa sería, sen dúbida, unha opción para ter en conta. A extensión de 90 días é algo que probablemente se fará, porque é apropiado. Temos que analizalo con coidado. É unha situación moi importante", dixo nunha entrevista telefónica coa cadea NBC News horas antes da súa investidura o domingo.

O Tribunal Supremo dos EUA deu luz verde, este venres, a unha lei que obriga a TikTok a suspender as súas operacións no país antes do 19 de xaneiro por non desvincularse da súa empresa matriz, a chinesa ByteDance.

En principio, corresponderíalle ao mandatario saínte, Joe Biden, tomar medidas ese día para garantir que a rede social deixe de operar por razóns de seguridade nacional, pero a Casa Branca decidiu deixar esa responsabilidade en mans de Trump.

TikTok anunciou tamén o venres que segue coa idea de suspender as súas operacións nos Estados Unidos o 19 de xaneiro, malia a decisión tomada.

A extensión de 90 días daría tempo a ByteDance a vender a plataforma a un comprador que non sexa chinés. Esa prórroga está explicitamente permitida por unha lei bipartidista do ano pasado baixo condicións específicas.

Trump indicou a NBC News que, se a súa Administración opta por ese novo prazo, "probablemente" fará o anuncio o luns, día no que está previsto que asista á investidura, entre outros, o CEO de TikTok, Shou Chew.

A toma de posesión será no interior do Capitolio por mor das baixas temperaturas previstas para o vindeiro día 20.