Unha das falecidas no accidente era unha veciña de Agolada de 58 anos

Mercedes Castro Blanco, de 58 anos e veciña de Santo André, na parroquia de Carmoega, en Agolada, é unha das vítimas mortais do accidente do autobús en Pedre.

A muller decidiu ir ata Lalín coller o autocar, onde deixou o seu turismo, para viaxar ata Pontevedra no transporte público e poder pasar a Noiteboa coa familia. Alí vive a súa irmá, coa que ía pasar as festas, e a filla, canda os seus dous netos de curta idade.

Tras non ter contacto con ela e como tardaba en chegar, souberon que se desprazaba no autocar ata a cidade. Por Internet coñeceron o accidente e desprazáronse ata o lugar do suceso. Alí identificaron o seu cadáver.

A muller era moi coñecida en Agolada. Mercedes Castro, gandeira xubilada, perdeu a súa nai, de 96 anos, despois de que muller se precipitara por unha ventá.

O Concello de Agolada publicou en Facebook as súas condolencias pola traxedia de Cerdedo-Cotobade en que morreu unha das súas veciñas.