Unha persoa foi evacuada no incendio dunha vivenda en Ponteareas
O incendio iniciouse nunha cociña de leña e estendeuse ao tellado da vivenda, que ardeu en parte
TVG
Unha persoa foi trasladada ao centro hospitalario de referencia no incendio dunha vivenda este luns de madrugada en Ponteareas (Pontevedra).
Segundo informan os servizos de emerxencias, o lume ocasionou considerables danos materiais.
O incendio iniciouse nunha cociña de leña e estendeuse ao tellado da vivenda.
Foi un particular quen alertou de que a vivenda dos seus veciños estaba a arder no lugar de Penela, na parroquia de Cristiñade.
Os bombeiros de Ponteareas levaron a cabo as tarefas de extinción do lume, que se propagou a través das vigas de madeira e queimou parte do tellado.
Os sanitarios que se desprazaron ao lugar trasladaron unha persoa ao hospital nunha ambulancia.
