Visita sorpresa da primeira ministra italiana, Giorgia Meloni, a Donald Trump

A primeira ministra italiana, Giorgia Meloni, reuniuse este sábado por sorpresa co presidente electo dos Estados Unidos, Donald Trump, na súa residencia de Mar-a-Lago, en Florida, segundo recollen os medios italianos.

Unhas cinco horas despois da súa chegada, a mandataria regresou a Roma. Segundo recollen os medios, Trump e Meloni compartiron unha cea e asistiron á proxección dun documental sobre o sistema xudicial estadounidense.

O filme "Eastman Dilemma: Lawfare or Justice" sostén a tese de que nos últimos anos os EUA foron testemuña do xurdimento dun "sistema xudicial con dúas varas de medir" que atacou inxustamente a avogacía que representa a clientela conservadora.

"É moi emocionante, estou aquí cunha muller fantástica, a primeira ministra italiana. Realmente tomo a Europa por sorpresa", recolle a radio televisión pública italiana (RAI) citando algúns xornalistas estadounidenses presentes na residencia de Trump.

Segundo os medios italianos, a reunión de Meloni con Trump foi unha oportunidade para falar sobre o caso de Cecilia Salga, a xornalista italiana detida por Irán o mes pasado, ligado ao arresto en Italia do enxeñeiro iraniano Mohammad Abedini.

Asuntos de interese para Europa

No encontro, tamén abordaron outros asuntos de interese para Europa, como a subministración de gas, a guerra en Ucraína, o conflito aberto en Oriente Próximo ou os aranceis que Trump podería impoñer.

Tamén estiveron na xuntanza o senador da Florida Marco Rubio, nomeado secretario de Estado por Trump, o congresista da Florida Mike Waltz, nomeado asesor de seguridade nacional, e Scott Bessent, nomeado secretario do Tesouro.

O presidente dos Estados Unidos, Joe Biden, ten previsto viaxar a Italia do 9 ao 12 de xaneiro, nos últimos días do seu mandato.

O avión de Meloni no aeroporto de West Palm Beach. REUTERS/Carlos Barria