A folga de Iberia en Santiago provoca a cancelación de conexións con Madrid e Bilbao este xoves

A convocatoria de folga por parte de persoal de Iberia no aeroporto de Santiago terá efectos xa este xoves, na primeira das dúas xornadas da mesma. Producirase a cancelación de dúas conexións con Madrid e unha con Bilbao, ademais dos voos de regreso.

Convocáronse dúas xornadas de paro, os días 16 e 17, para denunciar a "sobrecarga" de traballo por "falta de persoal" no aeroporto da Lavacolla. Así o confirmaron a Europa Press fontes da sección sindical de UXT da compañía na capital galega.

O sindicato denuncia que a situación aínda se "agrava máis" polo peche do aeroporto de Vigo e, por tanto, polo desvío de carga de traballo a Santiago. En concreto, o sindicato incide en que hai quendas que mesmo poden ir desde as 5:00 horas ata as 18:00 horas, con xornadas partidas para atender picos de traballo, o que "dificulta seriamente a conciliación da vida laboral e persoal" dos traballadores e traballadoras.

Ademais, incide en que estas "condicións precarias" afectan á saúde dos traballadores e traballadoras de Iberia en Santiago, con riscos "moi serios, tanto físicos como psicolóxicos".

UXT, que tamén convocou unha concentración este xoves para as 12:00 horas nas saídas do aeroporto Rosalía de Castro, remarca que leva tempo denunciando esta situación no servizo de asistencia en terra da compañía no aeroporto compostelán, e que Iberia "escúdase nun suposto normal funcionamento e dá a calada por resposta".