Comerciantes da Cubela, na Coruña, piden máis prazas de estacionamento para salvar os seus negocios
Din que a facturación dos seus negocios caeu ata un 40 por cento
Atribúeno á falata de estacionamento e ás obras de humanización
Os comerciantes da Cubela, na Coruña, levan sete meses padecendo as obras de humanización da rúa Puente. Unha reforma necesaria, aseguran, pero que deixa o barrio sen prazas de estacionamento e a eles sen clientes.
Mónica Rial, propietaria dun salón de peiteado na zona, di que os seus clientes quéixanse continuamente de que non se pode estacionar o vehículo nas proximidades do seu negocio.
Din que as obras que se están levando a cabo no barrio e a falta de prazas de aparcamento provocaron unha caída da facturación de entre o 15 e o 40 por cento na meirande parte de negocios da zona.
É o caso da ferretería de Elimar Correia. Están en liquidación por peche. Din que en parte polos sete meses de obras e pola falla de prazas de aparcamento.
Suraya Djekki ten unha tenda a escasos dez metros e está a piques de mudarse a outra zona da cidade onde non haxa estes problemas de aparcamento. Asegura que as vendas caeron entre un 30 e un 40 por cento dende que comezaron as obras de humanización.
Moitos comerciantes resístense a darse por vencidos e están recollendo sinaturas para dotar o barrio de máis prazas de estacionamento.
Suso Cambón leva 30 anos rexentando unha libraría no barrio. Di que unha opción viable sería a creación de prazas de estacionamento rápidas vixiadas.
Dende o Concello da Coruña comprometéronse a estudar a creación de prazas de estacionamento rápido no barrio.
