Comeza unha nova semana de folga entre os traballadores de Ryanair

Os tripulantes de cabina de Ryanair seguen en folga unha semana máis, e pensan estendela ata despois do Nadal. 

Ata esta hora, o voo provinte de Málaga e o que sae da Lavacolla cara a esa cidade víronse afectados con atrasos dunha hora. Os avións seguen indo cheos e as reticencias dos usuarios en voar coa aeroliña seguen sendo menores a pesar das incertezas que supón.

En Galicia, os voos cancelados por estas protestas este ano foron mínimos porque Ryanair suple as ausencias con traballadores doutros países.

A folga ten máis incidencia no resto de España. Esta mañá rexistráronse 6 voos cancelados en Barcelona e 78 atrasos no total do Estado.

Os empregados esixen que a dirección da empresa sente a negociar con eles para que cumpra a lei laboral española.