Arde unha granxa de polos na parroquia de Lea, en Friol
O lume provoca máis de 15.000 euros en danos nunha nave da explotación avícola
Nunha explotación avícola das Casas dos Galiñeiros, na parroquia friolesa de Lea, tiñan todo preparado para recibir unha nova remesa de pitos, pero non puido ser debido a un incendio.
Foi o dono da granxa quen se decatou de que estaba a arder e o primeiro en botarlle auga cunha mangueira. Deseguido, chegaron os efectivos de Protección Civil de Friol e tres dotacións dos bombeiros de Vilalba, que traballaron durante unha hora na extinción das lapas.
José Manuel Lourés, dono da explotación avícola: "Díxenlles que o lume estaba no chan e co fume que había eu non podía entrar e eles si. Entón eles miraron cunha cámara térmica e viron que o lume estaba en tres ou catro puntos e que o ían apagar. Portáronse ben".
Segundo o dono da explotación, a contía dos danos na nave supera os 15.000 euros. A isto hai que engadir as perdas derivadas de non poder criar polos durante arredor dun mes e medio.
José Manuel Lourés: "Pero que se lle vai facer. Moitas perdas, reparar todo o que ardeu e a seguir loitando".
Polo de agora, descoñécense as causas do incendio.
