Conmoción en Touro pola morte dun mozo de 19 anos nun accidente de tráfico
O vehículo que conducía foise da vía no lugar de Loxo
Eran as once da mañá cando un particular chamaba ao 112 para pedir asistencia sanitaria urxente para o condutor e único ocupante dun vehículo que se botara da calzada e batera contra unha árbore no punto quilométrico 15 da estrada AC-240, na parroquia de Loxo, no concello de Touro.
Nesta chamada tamén se informou os servizos sanitarios de que o condutor ferido xa fora evacuado do coche. Inmediatamente se desprazou ata o lugar un helicóptero medicalizado con persoal do servizo de urxencias sanitarias.
Cando aterraron preto do lugar do accidente nada puideron facer por salvarlle a vida ao condutor, un rapaz de 19 anos que volvía de levar a súa irmá á catequese na igrexa parroquial de Santa María de Loxo.
O accidente produciuse apenas a un quilómetro de distancia do domicilio no que o rapaz vivía canda a súa familia. A Garda Civil investiga as circunstancias do accidente.
Tamén acudiron ao lugar dos feitos os bombeiros de Arzúa, Tráfico e voluntarios de Protección Civil.
