Morre unha muller de 80 anos atropelada nun paso de peóns na Caniza por un condutor bébedo

Unha muller de 80 anos de idade que fora evacuada en helicóptero logo de sufrir un atropelo na Caniza perdeu finalmente a vida. Ao parecer o condutor deu positivo na proba de alcohol.

O accidente produciuse cara ás 16:20 horas e, segundo a información recollida pola central de emerxencias, a vítima foi atropelada na rúa do Progreso, nunha zona que conta cun paso sinalizado para peóns.

O 112 informou ao Servizo de Urxencias Sanitarias de Galicia-061, que mobilizou ata o punto o helicóptero medicalizado con base en Ourense.

Unha vez chegou o persoal sanitario ata a zona, a persoa ferida foi evacuada a bordo do helicóptero ata o hospital de referencia, onde finalmente faleceu.